بے رونق سونے کے زیورات کو دوبارہ چمکدار کیسے بنائیں؟

سونے کے زیورات وقت گزرنے کے ساتھ اپنی قدرتی چمک کھونے لگتے ہیں، لیکن چند آسان گھریلو طریقوں کی مدد سے ان پر جمی میل اور چکنائی صاف کر کے ان کی خوبصورتی دوبارہ بحال کی جا سکتی ہے۔ سونا کالا ہونے کی اصل وجہ کیا ہے؟ خالص سونا عام حالات میں آسانی سے کالا نہیں پڑتا، تاہم زیورات میں شامل دوسری دھاتیں، پسینہ اور مختلف کیمیائی مادے رنگت میں تبدیلی کا باعث بن سکتے ہیں۔ اگر زیور پر سیاہ دھبے برقرار رہیں تو اسے بار بار رگڑنے کے بجائے کسی مستند سنار سے معائنہ کروائیں کیونکہ ہر دھبہ عام صفائی سے دور نہیں ہوتا۔ گھر پر سونے کے زیورات کیسے صاف کریں؟ عام سونے کے زیورات کی صفائی کے لیے ایک پیالے میں نیم گرم پانی لیں اور اس میں ہلکے ڈش واشنگ لیکویڈ کے چند قطرے شامل کریں۔ اب زیورات کو تقریباً 10 سے 15 منٹ تک اس محلول میں بھگو کر رکھیں تاکہ ان پر جمی چکنائی اور میل نرم ہو جائے۔ اس کے بعد نرم ریشوں والے برش کی مدد سے زیورات کے باریک ڈیزائن اور کونوں کو احتیاط سے صاف کریں۔ آخر میں صاف پانی سے دھو کر نرم، خشک کپڑے سے اچھی طرح پونچھ لیں۔ زیورات صاف کرتے وقت کن باتوں کا خیال رکھیں؟ زیورات کی صفائی کے لیے ابلتے پانی، ٹوتھ پیسٹ، بیکنگ سوڈا یا سخت برش کے استعمال سے گریز کریں کیونکہ یہ بعض زیورات کی سطح اور نگینوں کو نقصان پہنچا سکتے ہیں۔ موتی، فیروزہ، مرجان یا دیگر نازک پتھروں والے زیورات کو پانی میں بھگونے کے بجائے کسی ماہر سے صفائی کروانا بہتر ہے۔ اسی طرح گولڈ پلیٹڈ زیورات کو زیادہ دیر پانی میں رکھنے یا رگڑنے سے ان پر چڑھی سونے کی تہہ متاثر ہو سکتی ہے۔