ایف آئی اے نے اسلام آباد اور راولپنڈی میں دو مختلف مقامات پر چھاپے مار کر ویزا فراڈ نیٹ ورک سمیت غیر قانونی اوورسیز ایمپلائمنٹ ایجنسی کو بے نقاب کرکے ایجنسی کے سی سی ای او اور مینجر سمیت ویزا فراڈ کے ملزم کو گرفتار کرلیا۔ حکام کے مطابق ایف آئی اے اسلام آباد زون کے اینٹی ہیومن ٹریفکنگ سرکل اسلام آباد نے برطانیہ ورک ویزا فراڈ میں ملوث ملزم سید ماجد حسین کو راولپنڈی میں چھاپہ مار کر مقدمہ نمبر 330/2026 میں گرفتار کرلیا۔ متاثرہ شہری کے مطابق ملزم نے بھتیجے نعمان علی کو برطانیہ میں بطور میسن ورک ویزا پر بھجوانے کا جھانسہ دے کر مبینہ طور پر 34 ہزار پاؤنڈ اور 4 لاکھ 65 ہزار روپے وصول کیے۔ بعد ازاں 25 ہزار 500 پاؤنڈ واپس کیے، تاہم باقی ماندہ 8 ہزار 500 پاؤنڈ اور 4 لاکھ 65 ہزار روپے واپس نہ کیے۔ دوسری جانب ایف آئی اے اسلام آباد زون اینٹی ہیومن ٹریفکنگ سرکل راولپنڈی نے بیورو آف اوورسیز ایمپلائمنٹ راولپنڈی کی فراہم کردہ اطلاع پر آفس نمبر305 اور 306، راول مال اینڈ ریذیڈنشیا، چاندنی چوک، راولپنڈی میں غیر قانونی طور پر چلائی جانے والی اوورسیز ایمپلائمنٹ ایجنسی "Phoenix HR Consultant" پر چھاپہ مارا۔ بیورو آف امیگریشن اینڈ اوورسیز ایمپلائمنٹ نے تصدیق کی کہ مذکورہ ایجنسی بغیر کسی قانونی لائسنس یا اجازت کے غیر قانونی بھرتی کی سرگرمیاں انجام دے رہی تھی اور امیدواروں کے انٹرویوز کا اہتمام کر رہی تھی۔ چھاپے کے دوران ایس ایچ او انسپکٹر عاشر ہارون کی نگرانی میں ٹیم نے ایجنسی کے سی ای او یاسر عرفات اور مینیجر حاجی وقار کو موقع پر ہی گرفتار کرلیا جبکہ چھاپے کے وقت تقریبا 15 امیگرینٹس کے انٹرویوز جاری تھے۔ حکام کے مطابق تلاشی کے دوران ملزمان کے قبضے سے متعدد، پاسپورٹ، امیدواروں کے انٹرویو ریکارڈز اور پروموشنل بینرز برآمد کیے گئے، ملزمان کے خلاف امیگریشن آرڈیننس 1979ء اور تعزیراتِ پاکستان کی متعلقہ دفعات کے تحت مقدمہ درج کرلیا گیا۔ ڈائریکٹر ایف آئی اے اسلام آباد زون شہزاد ندیم بخاری کا کہنا تھا کہ ایف آئی اے اسلام آباد زون غیر قانونی اوورسیز ایمپلائمنٹ ایجنسیوں اور انسانی اسمگلنگ میں ملوث عناصر کے خلاف قانونی کارروائیاں جاری رکھنے کے لیے پُرعزم ہے۔